How to Apply - Samoan Translation

Talosaga mo se Visa i le Iunaite Setete i Samoa

Ua mafai nei e tagata i Samoa ona talosaga mo se visa i le ofisa o le Amepasa a le Iunaite Setete i Apia, nai lo le tau malaga atu i Aukilani. E taitolu masina ma malaga mai i Apia se sui konesula mai le Ofisa Aoao o le Konesula a le I.S. i Aukilani e faatalanoa tagata talosaga. E tatau i tagata talosaga ona faatumu le pepa talosaga o loo i le meliuila [online], i luga o le komepiuta, ona faatulaga lea o se avanoa i luga lava o le meliuila mo se faatalanoaga, ma totogi le tau masani e 314.40 Tala po o le US$131.00, i le ofisa o le Amepasa i le aso o le faatalanoaga. E faatapulaa faatalanoaga o visa e mafai ona faataunuuina e le sui konesula i malaga taitasi. O le aofai o tagata talosaga e sailia ni faatalanoaga e ono sili atu nai lo le aofai faatulagaina o a matou faatalanoaga, o le mea lea, atonu o le a le mafai ai ona matou faatalanoaina tagata talosaga uma i lena lava taimi.

NB:

O le a tatalaina le on-line calendar mo avanoa e saili ai visa tafao e le ofisa a le Amepasa o Amerika i le 2:00 i le aoauli, Aso Lua, Aperila 28, 2009 mo le vaiaso o faatalatalanoaga o visa ua faatatau mo le vaiaso o Iuni 8 – 12, 2009.

Mo e ua mautinoa avanoa mo le faatalatalanoaina o le visa e tatau ona aumai i le ofisa latou pepa talosaga, tusi folau, ma le ata tusifolau 2 X 2 inisi ae lei o’o i le Aso Faraile, Me 15, 2009 i le ta o le 3:30 afiafi (taimi i Apia). O le le tauaaoina mai pepa i le aso faatupulaaina o le a faaleagaina ai lou avanoa, ma o le a toe tatala le avanoa mo isi tagata talosaga.

Afai e le’i manuia i le sailiga o se avanoa mo faatalanoaga i le taimi muamua, o le a toe tatala le kalena i le Aso Lua, Me 19, 2009 i le 10:00 i le taeao. Mo e ua maua avanoa i lea aso, o le a faamuta le taliaina o pepa talosaga, ata tusifolau, lau tusifolau/kopi o le laupepa muamua o lau tusifolau e tauaao mai i le Ofisa a le Amepasa ae lei oo i le Aso Faraile, Me 29, 2009 i le 3:30 i le afiafi. O le le tauaaoina mai o pepa i le aso faatupulaaina o le a faaleagaina ai lou avanoa, ma muta ai foi lea avanoa mo isi.

FAAMOLEMOLE afai o le a faatumu lau pepa talosaga e se isi, o lau galuega (tagata talosaga) o le tuuina atu o faamatalaga uma mo le faatumuina. O lau matafaioi o le tuuina o faamatalaga sao ma le faamoni, aemaise faamatalaga i malaga muamua i Amerika, feeseeseaiga i malaevalele  i Amerika, faafitauli tau faaletulafono, mmf. O lou le tuuina mai o ia faamatalaga, o loo faaalia mai ai lau taumafai e taufaasese, ma e iu I le le faamanuia ai lou talosaga (le mafai ona faafoi tupe totogi) ma lou agavaa isi faatalanoaga i le lumanai. Aua le tuuina mai faimatalaga sese. Ua tele taimi ua faaleaogaina ai talosaga a nisi ina ua tuuina mai le-mafaufauina faamatalaga le moni. Faamolemole toe taga’ai tasi i lau tusi talosaga.

O faiga o avanoa o faatalatalanoaga o visa e faaaoga ai metotia komepiuta e resitara ai. I le taimi e tumu ai avanoa o faatalatalanoaga o visa, e le mafai ona toe resitara se isi. Faamolemole aua le resitara pe afai e te le mautonu pe auai i lou avanoa o faatalatalanoaga o visa. Afai foi o le a le mafai ona e auai mai, faamolemole valaau mai le ofisa ina ia mafai ona tatala le avanoa mo isi tagata. O lou sootauau mai i galuega a le ofisa o le a mautinoa ai le vave.

Mo faamatalaga i auala e talosaga ai se visa mo lea vaiaso, faamolemole alu I le tuatusi lenei:http://samoa.usembassy.gov/how_to_apply_sm.html

Laasaga 1:  Faatumu le Fomu Eletonika mo se Visa [Electronic Visa Application Form (EVAF)]

Alu i le Initoneti i le tuatusi o loo taua i lalo:
http://evisaforms.state.gov/

Faatumu le pepa talosaga DS-156 i luga o le komepiuta e ala i le faatumuina i faamatalaga o loo talosagaina. Ia lolomi mai lenei fomu pe a maea ona e faatumuina i luga o le komepiuta, ma sainia loa. E tatau i se matua ona saini mo se tamaitiiti e i lalo ifo o le 14 tausaga. Ia faapipii ai se ata lanu aupito lata mai e 5 x 5 cm o foliga o le tagata talosaga, o le pito i luma o foliga atoa, i se vaaiga lanutasi pito i tua.

Faamolemole aua le lolomiina le fomu ona tusitusi ai lea e faatumu ai. Afai e te faia [tusitusi i luga o le fomu], o le a le taliaina oe mo se faatalanoaga.

O le isi vaega e sosoo ai, afai o oe o se alii o le vaitausaga 16-45, faaaoga le pepa talosaga faaopoopo DS-157 (  PDF). O le fomu lenei, e na o alii o le vaitausaga 16-45 e faatumuina. Faatumu le fomu lenei i luga o lau komepiuta. Ona lolomi lea [o le fomu na faatumuina].

Tauaao mai fomu uma e lua i le faatalanoaga.

E mafai ona e maua i lalo ifo le faaliliuga faaSamoa o pepa talosaga. O [fomu] ua faaliliuina e mo na o lou silafia. E le mafai ona faaaogaina [fomu] nei o ni fomu aloaia:

• Visa Application Form DS-156 non-immigrant visa application (  PDF) - Samoan
• Visa Application Form DS-157 Supplemental non-immigrant visa application (  PDF) - Samoan

Laasaga 2:  Fuafua se Avanoa mo se Faatalanoaga

Alu i le Initoneti i le tuatusi lenei: Schedule an Appointment mo se fomu talosaga mo se faatalanoaga.

O loo i ai se fuainumera faamauina [bar code] i le itulau lona tolu o lau pepa talosaga mo se visa. O lalo ifo o le fuainumera faamauina o loo i ai se numera. O le numera lenei e tau o le EVAF. Tuu le numera lenei i luga o le fomu talosaga mo se faatalanoaga.

Filifili se taimi ma se aso e te susū atu ai i le ofisa o le Amepasa ma tuu i ai isi faamatalaga o loo talosagaina.

Lolomi se kopi o le faamaoniga o le avanoa mo se faatalanoaga.

Laasaga 3 : Tauaao mai lau Pepa Talosaga i le ofisa Amepasa ae lei o’o i le vaiaso o faatalatalanoaga o visa

O lenei laasaga e le faamalosia ae e taua tele. E tatau ona e sūsū mai i le Ofisa Amepasa ae lei oo i le vaiaso o faatalatalanoaga o visa mo le faamauina ia matou komepiuta o lau talosaga mo le visa. O le faia o lea tulaga o le a faigofie ma vave ai le faatalatalanoaga o visa e le gata mo oe le talosaga ae mo le mamalu lautele. O le faia foi o lea tulaga o le a faaitiitia ai le taimi e te faatalitali ai i le aso o le faatalatalanoaga o lou visa.

Laasaga 4:  Susū mai i le Faatalanoaga

Faamolemole ia tauaao mai le talosaga mo se visa, o le faamaoniga o le avanoa mo se faatalanoaga, ma le $314.40 Tala po o le US$131.00, tino i tupe po o se siaki a le faletupe (E LE taliaina siaki a le tagata lava ia) i le ofisa o le Amepasa a le Iunaite Sitete a Amerika i Apia:

Amepasa I Apia
Fogafale 5,
Ofisa o Taui o Faalavelave Faafuasei,
Matafele, Apia,
Samoa

Faamolemole ia susū mai i le taimi ma le aso o loo i luga o le faamaoniga o lou avanoa mo se faatalanoaga. Afai e te misia lou taimi faatulagaina, o le a le mafai ona matou faatalanoaina oe.

Laasaga 5:  Piki atu Lou Visa mai le Ofisa o le Amepasa

Afai e taliaina le talosaga, o le a matou auina atu lou tusifolau i Aukilani, lolomi ai lou visa, tuu i totonu o lou tusifolau, ma toe auina mai lou tusifolau i le ofisa o le Amepasa i Apia. O le tele lava o tulaga, o le a saunia le visa mo le pikiina atu i Apia i le lua i le tolu vaiaso talu ona maea lou faatalanoaga. O nisi mataupu e fai si faigata, o le a fai si umi atu. O le a faamalamalama atu e le tagata e faia le faatalanoaga lenei tulaga pe a alagatatau ai.

Click here to go back to the English translation of this page