Introducción

Internet convirtióse col tiempu, nuna parte cada vegada más importante nes nueses vides.

El proyeutu Mozilla ensámase d'una comunidá mundial de persones que camienta que l'apertura de la rede, la innovación y la oportunidá son fundamentales pa la salú d'Internet. Dende 1998 tenemos trabayao xuntos p'asegurar qu'Internet se desendolque en beneficiu de la sociedá. Conózsenos principalmente pola creación del restolador web Mozilla Firefox.

El proyeutu Mozilla básase nuna perspeutiva que tien na comunidá, la fonte de creación de software de códigu abiertu de primera calidá y que desendolca nueves clases d'actividaes collaboratives. Creamos comunidaes de persones dedicaes a algamar una meyor esperiencia n'Internet pa toos.

Como resultáu d'estos esfuercios, ellaboramos dalgunos principios que paécennos fundamentales pa qu'Internet continúe trabayando y beneficiando al públicu ansí como a los aspeutos comerciales de la vida. Darréu enumberamos estos principios.

Los oxetivos del Manifiestu son:

1. definir una visión d'Internet qu'espeye lo que los participantes de Mozilla deseyen que la Fundación Mozilla siga;
2. poder falar cola xente, tenga o non conocimientos téunicos;
3. llograr que los collaboradores de Mozilla tean arguyosos de lo que tamos faciendo y qu'esto nos afale a siguir; y
4. fornir un puntu de partida pa qu'otres persones ameyoren esta visión d'Internet.

Estos principios nun se faen realidá por sí mesmos. Faen falta persones pa facer d'Internet un espaciu abiertu y participativu, persones que trabayen de mou individual y n'equipu, y persones que llideren a otres. La Fundación Mozilla comprométese a avanzar nos principios afitaos nesti Manifiestu. Convidamos a toos a xunise a esti proyeutu y trabayar nesta xera, pa d'esta miente, facer d'Internet un llugar munchu meyor pa tol mundu.

Principios

1. Internet ye una parte integral de la vida moderna: un componente clave pa l'enseñu, la comunicación, la collaboración, los negocios, l'entretenimientu y pa la sociedá en conxuntu.
2. Internet ye un recursu públicu mundial que tien de siguir siendo abiertu y accesible.
3. Internet tien d'arriquecer la vida de los seres humanos.
4. La seguridá de los usuarios n'Internet ye fundamental y nun ha tratase como daqué opcional.
5. Los usuarios han tener la posibilidá d'amoldar la so propia esperiencia n'Internet.
6. La efectividá d'Internet como un recursu públicu depende de la interoperabilidá (protocolos, formatu de datos, conteníu), la innovación y la participación descentralizada en tol mundu.
7. El software llibre y de códigu abiertu promueve'l desendolcu d'Internet como un recursu públicu.
8. Los procesos tresparentes basaos na comunidá promueven la participación, la responsabilidá y l'enfotu.
9. L'usu comercial d'Internet apurre munchos beneficios al so desendolcu; ye enforma valoratible un equilibriu ente los oxetivos comerciales y el beneficiu públicu.
10. Maximizar los aspeutos de beneficiu públicu d'Internet ye un oxetivu que merez el nuesu tiempu, atención y compromisu.

Superar el Manifiestu de Mozilla

Esisten delles formes de facer xorrecer los principios del Manifiestu de Mozilla. Agospiamos un ampliu rangu d'actividaes y esperamos cuntar cola mesma creatividá que los participantes de Mozilla amosaron n'otres estayes del proyeutu. Pa les persones que nun tean fonderamente involucraes col proyeutu Mozilla, un mou básicu y bien efectivu de sofitar el Manifiestu ye usar Mozilla Firefox o cualesquiera de los otros productos que personifiquen los principios del Manifiestu.

El compromisu de la Fundación Mozilla

• La Fundación Mozilla comprométese a sofitar esti Manifiestu coles sos actividaes. Específicamente, comprometémonos a:
• crear y ufrir tanto teunoloxíes de códigu abiertu como comunidaes que sofiten los principios del Manifiestu;
• crear y distribuyir bonos productos que sofiten los principios del Manifiestu;
• usar los activos bienes de Mozilla (la so propiedá inteleutual, el copyright y les marques rexistraes, la so infraestructura, fondos y reputación) pa caltener Internet como una plataforma abierta;
• promover modelos col envís de crear valores económicos pal beneficiu públicu; y
• promover los principios del Manifiestu de Mozilla en discursos públicos y dientro de la industria d'Internet.

Dalgunes actividaes de la Fundación -anguaño, la creación, distribución y promoción de productos- fáense principalmente al traviés de la empresa subsidiaria Corporación Mozilla que ye propiedá de la Fundación Mozilla.

Invitación

La Fundación Mozilla invita a toles persones que sofiten los principios del Manifiestu de Mozilla a xunise a nós p'alcontrar nueves formes de facer realidá esta visión d'Internet.