Lóši započatk
Asistent za připrawjenje e-mejlowych kontow
Prjedy hač je so tuta funkcija zawjedła, dyrbjesće swoje nastajenja za IMAP, SMTP a SSL/TLS wědźeć. Wšitko, štož nětko trjebaće, je waše mjeno, waša e-mejlowa adresa a hesło, a asistent za připrawjenje e-mejlowych kontow so našeje datoweje banki wopraša a e-mejlowe nastajenja za was namaka.
Personalizowane e-mejlowe adresy
Sće hdy wo personalizowanej e-mejlowej adresy (na přikład "předmjeno@swójbnemjeno.de") za was, wašu swójbu abo swój wobchod sonił? Thunderbird to wosnadnja - móžeće so w Thunderbird za nowu e-mejlowu adresu registrować a wšitko budźe so awtomatisce připrawjeć, tak zo móžeće hnydom słać a přijimać.
E-mejlowe rajtarki
Thunderbird kopěruje nowy wonkowny wobraz Mozilla Firefox w prócowanju, podobne wužiwarske dožiwjenje přez cyłu softwaru Mozilla za desktop a mobilne graty a za wšě platformy skićić.
E-mejlowe rajtarki wam zmóžnjeja, e-mejlki w separatnych rajtarkach začitać, tak zo móžeće spěšnje mjez nimi tam a sem skakać. Rajtarki jewja so horjeka na menijowej lajsće, skića wizuelne dožiwjenje a dowoleja symbolowym lajstam so wjele wjace na kontekst poćahać.
E-mejlowe rajtarki dźerža wjacore e-mejlki za lochki přistup wočinjene. Dwojokliknjenje abo tłóčenje zapodawanskeje tasty na e-mejlowej powěsći budźe nětko tu powěsć we woknje noweho rajtarka wočinjeć.
Hdyž Thunderbird skónčiće, budu so widźomne rajtarki składować a wobnowjeć, hdyž Thunderbird přichodny raz wočinjeće. Je tež rajtarkowy meni na rajtarkowej lajsće, zo by wam pomhał, mjez rajtarkami přepinać.
Jednokliknjenski adresnik
Jednokliknjenski adresnik je spěšna a lochka móžnosć, ludźi wašemu adresnikej přidać. Přidajće ludźi z kliknjenjom na hwěžkowy symbol w powěsći, kotruž dóstanjeće. Dwě kliknjeni a móžeće wjace podrobnosćow kaž foto, narodniny a druhe kontaktowe informacije přidać.
Přiwěškowe dopomnjeće
Přiwěškowe dopomnjeće přepytuje tekst wašeje powěsće za słowom „přiwěšk“ (a druhe słowa kaž datajowe typy) a dopomina was, přiwěšk přidać, prjedy hač na Pósłać kliknjeće.
Chat z wjacorymi kanalemi
Wužiwajće rozmołwy we woprawdźitym času ze swojimi kontaktami, direktnje z wašeho najlubšeho powěstnika, z wjacorymi podpěranymi syćemi. Thunderbird wosnadnja, zańdźene rozmołwy a přijate e-mejlki přepytować.
Pytanje
Webpytanje
Móžeće web přepytować, bjeztoho zo byšće dyrbjał Thunderbird wopušćić. Zapisajće, štožkuli do mozow zajědźeće, do pytanskeho pola Thunderbird a wubjerće z wjacorych rozdźělnych pytanskich poskićowarjow.
Móžeće tež słowa w swojej e-mejli wuzběhnyć, klikńće z prawej tastu myše a wubjerće "Z [pytawa] za "[wuraz]" pytać", zo byšće swoje webpytanje startował.
Lajsta spěšneho filtra
Lajsta spěšneho filtra wam zmóžnja, swoje e-mejlki spěšnišo filtrować. Zapisajće słowa do pytanskeho pola spěšneho filtra a wuslědki so hnydom zwobraznjeja. Abo móžeće swoju e-mejl po nowych powěsćach, klučowych słowach a ludźoch w swojim adresniku filtrować. Móžeće tež filter „připinać“ abo składować a jón přez wjacore rjadowaki wužiwać.
Pytanske nastroje
Pytanski powjerch w Thunderbird wobsahuje filtrowanje a nastroje časoweje lajsty, zo by eksaktnje tutu e-mejlku namakał, kotruž pytaće. Thunderbird indikuje wše waše e-mejlki, zo by wam pomhał, hišće spěšnišo pytać. Waše pytanske wuslědki so w rajtarku zwobraznjeja, tak zo móžeće lochko mjez swojimi pytanskimi wuslědkami a druhimi e-mejlkami tam a sem přeńć.
Archiw powěsćow
Jeli měniće, zo trjebaće e-mejlku w přichodźe, ale chceće ju z póstoweho dochada wotstronić, bjeztoho zo byšće ju zhašał, archiwujće ju! Archiwowanje wam pomha, swój póstowy dochad zrjadować a swoju e-mejl w rjadowakowym systemje archiwa zaměstnić.
Přez kliknjenje na tłóčatko „Archiwować“ abo tłóčenje tasty „A“ budźe wašu e-mejl archiwować.
Zrjadowak aktiwitow
Zrjadowak aktiwitow registruje wšě interakcije mjez Thunderbird a wašim e-mejlowym poskićowarjom na jednym městnje. Njetrjebaće hižo hódać. Dyrbiće jenož do jednoho městna hladać, zo byšće wšitko widźał, štož so z wašej e-mejlu stawa.
Přiměrće swoje e-mejlowe dožiwjenje
Rjadowanje wulkich datajow
Rozdźělće wulke dataje z Thunderbird Filelink!
Móžeće nětko přenošowanje wulkich dokumentow pospěšić, nahrawajo je k poskićowarjej składowanskeho ruma online a rozdźělujo wotkaz, město toho zo byšće dataju direktnje jako powěsćowy přiwěšk pósłał. Powyšće słansku spěšnosć e-mejle a wobeńdźće wotpokazanje powěsće, jeli serwer přijimarja wulke dataje zakazuje. Jako přidatny bonus zalutujeće rum w swojim rjadowaku ‚Pósłane‘ a w póstowym dochadźe přijimarja.
Wonkowny wobraz
Z tak mjenowanymi „personami“, lochkimi „kožami“ (jendźelsće „skins“), móžeće wonkowny wobraz za Thunderbird hnydom změnić. Sta „kožow“ su k dispoziciji, wot najnowšich filmow, přez sławne zajimawostki hač do japanskich tattoowow. Móžeće tež z wjacorych drastow (jendźelsce „themes“) wubrać, kotrež symbole w Thunderbird porjeńšeja.
Zjednoćene rjadowaki
Zjednoćene rjadowaki wam pomhaja, wjacore e-mejlowe konta rjadować, kombinujo wosebite rjadowaki kaž waš póstowy dochad, Pósłane abo archiwowy rjadowak. Město toho zo byšće do póstoweho dochada kóždeho e-mejloweho konta šoł, móžeće wšě dochadźace e-mejlki w jednym rjadowaku Póstowy dochad widźeć.
Zrjadowak přidatkow
Namakajće a instalujće přidatki direktnje w Thunderbird. Njetrjebaće hižo websydło přidatkow wopytać - startujće město toho zrjadowak přidatkow. Njejsće sej wěsty, kotry přidatk je prawy za was? Pohódnoćenja, doporučenja, wopisanja a wobrazy přidatkow w akciji wam pomhaja, prawy za was wolić.
Zawěsćće a škitajće swoju e-mejl
Kónc ze spamom
Woblubowane čaporowe nastroje Thunderbird su so zaktualizowali, zo bychu spamej wo nós dale byli. Kóžda e-mejlka, kotruž přijimaće, přeběži načolne čaporowe filtry. Kóždy raz, hdyž powěsć jako spam markěrujeće, „wuknje“ Thunderbird a polěpšuje swoje filtrowanje, tak zo móžeće wjace časa wužiwać, zo byšće e-mejl čitał, kotraž je wam wažna. Thunderbird móže tež spamowe filtry wašeho e-mejloweho poskićowarja wužiwać, zo by čaporowu e-mejl wot wašeho póstoweho dochada wotdźeržował.
Mócna priwatnosć a Do Not Track
Thunderbird skići podpěru za wužiwarsku priwatnosć a škit přećiwo wobrazam z interneta. Zo by priwatnosć wužiwarjow zawěsćił, blokuje Thunderbird awtomatisce wobrazy z interneta w e-mejlowych powěsćach.
Thunderbird podpěruje tež nastajenje Do Not Track (Njeslědować). Tute je z webpytanjom zwjazane, da so wšak tež w druhich naprašowanjach za webstrony wužiwać, kotrež so přez přidatki zmóžnjeja.
Škit přećiwo kradnjenju datow
Thunderbird škita was přećiwo e-mejlowym wobšudstwam, kotrež pospytuja wužiwarjow zawjeśc, wosobinske a dowěrliwe informacije přeradźić, podawajo, hdyž powěsć je potencielny pospyt kradnjenja datow. Nimo toho warnuje Thunderbird was, hdyž na wotkaz kliknjeće, kotryž so wočiwidnje k druhemu websydłu wjedźe, hač URL w powěsći podawa.
Awtomatiske aktualizowanje
Aktualizowanski system Thunderbird přepruwuje, hač najnowšu wersiju wužiwaće, a informuje was, hdyž wěstotna aktualizacije je k dispoziciji. Tute wěstotne aktualizacije su małe (zwjetša 200 KB - 700 KB), dadźa wam jenož to, štož trjebaće a staraja so wo to, zo wěstotna aktualizacija so spěšnje sćahuje a instaluje. System awtomatiskeho aktualizowanja skići aktualizacije za Thunderbird na Windowsu, Mac OS X a Linux w přez 40 rozdźělnych rěčach.
Wotewrjene žórło
Žro Thunderbird je wuwiwanski proces wotewrjeneho žórła, kotryž so wot tysacow pasioněrowanych, nazhonjenych wuwiwarjow a wěstotnych ekspertow z cyłeho swěta doprědka ćeri. Naša wotewrjenosć a aktiwne zhromadźenstwo ekspertow pomhatej zawěsćić, zo naše produkty su wěsćiše a so spěšnje aktualizuja, mjeztym zo nam tež zmóžnjeja, lěpšinu najlěpšich wěstotnych skanowanskich a wuhódnoćenskich nastrojow třećich poskićowarjow wužiwać, zo bychu cyłkownu wěstotu dale powyšili.