Lažčejšy zachopjeńk
Asistent za zarědowanje e-mailowych kontow
Nježli až jo se toś ta funkcija zawjadła, sćo musył wěźeś swóje nastajenja za IMAP, SMTP a SSL/TLS. Wšykno, což něnto trjebaśo, jo wašo mě, waša e-mailowa adresa a gronidło, a asistent za zarědowanje e-mailowych kontow wótpšašujo našu datowu banku a namakajo e-mailowe nastajenja za was.
Personalizěrowane e-mailowe adrese
Sćo gdy wó personalizěrowanej e-mailowej adresy (na pśikład „pśedmě@familijowemě.de“) za was, wašu familiju abo swój wobchod cował? Thunderbird to wólažcujo - móžośo se w Thunderbird za nowu e-mailowu adresu registrěrowaś a wšykno buźo se awtomatiski zarědowaś, tak až móžośo ned słaś a dostaś.
E-mailowe rejtarki
Thunderbird kopěrujo nowy wenkowny naglěd Mozilla Firefox w procowanju, pódobne wužywarske dožywjenje pśez cełu softwaru Mozilla za desktop a mobilne rědy a za wšykne platformy bitowaś.
E-mailowe rejtarki wam zmóžnjaju, mejlki w separatnych rejtarkach zacytaś, tak až móžośo malsnje mjazy nimi tam a zas skokaś. Rejtarki pokazuju se górjejce na menijowej rědce, bituju wizuelne dožywjenje a dowóluju symbolowym rědkam se wjele wěcej na kontekst póśěgowaś.
E-mailowe rejtarki źarže někotare mejlki za lažki pśistup wócynjone. Dwójokliknjenje abo tłócenje zapódawańskeje tasty na e-mailowej powěsći buźo něnto tu powěsć we woknje nowego rejtarka wócynjaś.
Gaž skóńcyjośo Thunderbird, budu se widobne rejtarki składowaś a wótnowjaś, gaž wócynjaśo Thunderbird pśiducy raz. Jo teke rejtarkowy meni na rejtarkowej rědce, aby wam pomagał, mjazy rejtarkami pśešaltowaś.
Jadnokliknjeński adresnik
Jadnokliknjeński adresnik jo malsna a lažka móžnosć, luźi wašomu adresnikoju pśidaś. Pśidajśo luźi z kliknjenim na gwězdkowy symbol w powěsći, kótaruž dostanjośo. Dwě kliknjeni a móžośo wěcej drobnostkow ako foto, narodny źeń a druge kontaktowe informacije pśidaś.
Pśidankowe dopomnjenje
Pśidankowe dopomnjenje pśepytujo tekst wašeje powěsći za słowom „pśidank“ (a druge słowa ako datajowe typy) a dopomina was, pśidank pśidaś, nježli až kliknjośo na Pósłaś.
Chat z někotarymi kanalami
Wužywajśo rozgrona w napšawdnem casu ze swójimi kontaktami, direktnje z wašogo nejlubšego powěstnika, z někotarymi pódpěranymi seśami. Thunderbird wólažcujo, zajźone rozgrona a dostane mejlki pśepytowaś.
Pytanje
Webpytanje
Móžośo web pśepytowaś, mimo až musyśo Thunderbird spušćiś. Zapišćo, cožkuli pśizo wam do mysli, do pytańskego póla Thunderbird a wubjeŕśo z někotarych rozdźělnych pytańskich póbitowarjow.
Móžośo teke słowa w swójej mejlce wuzwignuś; klikniśo z pšaweju myškoweju tastu a wubjeŕśo "Z [pytnica] za "[wuraz]" pytaś", aby swójo webpytanje startował.
Rědka malsnego filtra
Rědka malsnego filtra wam zmóžnja, waše mejlki malsnjej filtrowaś. Zapišćo słowa do pytańskego póla malsnego filtra a wuslědki se ned pokazuju. Abo móžośo swóju e-mail pó nowych powěsćach, klucowych słowach a luźach w swójim adresniku filtrowaś. Móžośo teke filter „pśipěś“ abo składowaś a jen pśez někotare zarědniki wužywaś.
Pytańske rědy
Pytański pówjerch w Thunderbird wopśimujo filtrowanje a rědy casoweje rědki, aby eksaktnje toś tu mejlku namakał, kótaruž pytaśo. Thunderbird indicěrujo wšykne waše mejlki, aby wam pomagał, hyšći malsnjej pytaś. Waše pytańske wuslědki pokažu se w rejtarku, tak až móžośo lažko mjazy swójimi pytańskimi wuslědkami a drugimi mejlkami tam a zas pśejś.
Archiw powěsćow
Jolić měniśo, až trjebaśo mejlku w pśichoźe, ale cośo ju z dochada posta wótpóraś, mimo až ju lašujośo, archiwěrujśo ju! Archiwěrowanje wam pomaga, swój dochad posta zastojaś a swóju e-mail w zarědnikowem systemje archiwa zaměstniś.
Pśez kliknjenje na tłocašk „Archiwěrowaś“ abo tłocenje tasty „A“ buźo wašu e-mail archiwěrowaś.
Zastojnik aktiwity
Zastojnik aktiwity registrěrujo wšykne interakcije mjazy Thunderbird a wašym e-mailowym póbitowarjom na jadnem městnje. Njetrjebaśo wěcej gódaś. Musyśo jano do jadnogo městna glědaś, aby wšykno wiźeł, což stawa se z wašeju e-mailu.
Pśiměrśo swójo e-mailowe dožywjenje
Zastojanje wjelikich datajow
Rozdźělśo wjelike dataje z Thunderbird Filelink!
Móžośo něnto pśenosowanje wjelikich dokumentow póspěšyś, z tym až nagrawaśo je k póbitowarjeju składowańskego ruma online a rozdźělujośo wótkaz, město togo aby dataju direktnje ako powěsćowy pśidank pósłał. Powušćo słańsku spěšnosć mejlki a wobijajśo se wótpokazanja powěsći, jolic serwer dostawarja zakazujo wjelike dataje. Ako pśidatny bonus žariśo rum w swójom zarědniku‚Pósłane‘ a w postowem dochaźe dostawarja.
Wenkowny naglěd
Z tak pomjenjonymi „personami“, lažkimi „kóžami“ (engelski „skins“), móžośo wenkowny naglěd za Thunderbird ned změniś. Sta „kóžow“ su k dispoziciji, wót nejnowšych filmow, pśez sławne zajmnostki až do japańskich tattoo. Móžośo teke z někotarych drastwow (engelski „themes“) wubraś, kótarež pśerědnjaju symbole w Thunderbird.
Zjadnośone zarědniki
Zjadnośone zarědniki wam pomagaju, někotare e-mailowe konta zastojaś, z tym až kombiněruju wósebne zarědniki ako waš dochad posta, Pósłane abo archiwowy zarědnik. Město togo aby šeł do dochada posta kuždego e-mailowego konta, móžośo wšykne dochadajuce mejlki w jadnom zarědniku Dochad posta wiźeś.
Zastojnik dodankow
Namakajśo a instalěrujśo dodanki direktnje w Thunderbird. Njetrjebaśo wěcej se k websedłoju dodankow woglědaś - startujśo město togo zastojnik dodankow. Njejsćo se wěsty, kótary dodank jo pšawy za was? Pógódnośenja, dopórucenja, wopisanja a wobraze dodankow w akciji wam pomagaju, pšawy za was wóliś.
Zawěsććo a šćitajśo swóju e-mail
Kóńc ze spamom
Woblubowane cajkowe rědy Thunderbird su se zaktualizěrowali, aby wó kusack pśed spamom byli. Kužda mejlka, kótaruž dostawaśo, pśejźo wurědne cajkowe filtry. Kuždy raz, gaž markěrujośo powěsć ako spam, „wuknjo“ Thunderbird a pólěpšujo swójo filtrowanje, tak až móžośo wěcej casa wužywaś, aby e-mail cytał, kótaraž jo wam wažna. Thunderbird móžo teke spamowe filtry wašogo e-mailowego póbitowarja wužywaś, aby cajkowu e-mail wót wašogo dochada posta wótźaržował.
Mócna priwatnosć a Do Not Track
Thunderbird bitujo pódpěru za wužywarsku priwatnosć a šćit pśeśiwo wobrazam z interneta. Aby priwatnosć wužywarjow zawěsćił, blokěrujo Thunderbird awtomatiski wobraze z interneta w e-mailowych powěsćach.
Thunderbird pódpěra teke nastajenje Do Not Track (Njeslědowaś). Toś to jo z webpytanim zwězane, dajo se pak teke w drugich napšašowanjach za webboki wužywaś, kótarež zmóžnjaju se pśez dodanki.
Šćit pśeśiwo kšadnjenjeju datow
Thunderbird šćita was pśeśiwo e-mailowym wobšudnistwam, kótarež wopytuju wužywarjow zawjaśc, wósobinske a dowěrliwe informacije pśeraźiś, z tym až pódawa, gaž powěsć jo potencielny wopyt kšadnjenja datow. Mimo togo warnujo Thunderbird was, gaž kliknjośo na wótkaz, kótaryž wjeźo widobnje k drugemu websedłoju ako URL w powěsći pódawa.
Awtomatiske aktualizěrowanje
Aktualizěrowański system Thunderbird pśeglědujo, lěc wužywaśo nejnowšu wersiju a informěrujo was, gaž wěstotna aktualizacije jo k dispoziciji. Toś te wěstotne aktualizacije su małe (zwětšego 200 KB - 700 KB), daju wam jano to, což trjebaśo a staraju se wó to, až wěstotna aktualizacija se malsnjej ześěgujo a instalěrujo. System awtomatiskego aktualizěrowanja bitujo aktualizacije za Thunderbird na Windowsu, Mac OS X a Linux we wušej 40 rozdźělnych rěcach.
Wótwórjone žrědło
Jědro Thunderbird jo wuwijański proces wótwórjonego žrědła, kótaryž pógónjujo se wót towzyntow pasioněrowanych, nazgónitych wuwijarjow a wěstotnych ekspertow z cełego swěta. Naša wótwórjonosć a aktiwne zgromaźeństwo ekspertow pomagatej zawěsćiś, až naše produkty su wěsćejše a se malsnjej aktualizěruju, mjaztym až nam teke zmóžnjaju, lěpšynu nejlěpšych wěstotnych skannowańskich a wugódnośeńskich rědow tśeśich póbitowarjow wužywaś, aby cełkownu wěstotu dalej pówušyli.